అవినీతి-రాజనీతి

- శంకరనారాయణ

''కామిగాక మోక్షగామియు కాడయా విశ్వదాభిరామ వినురవేమ!'' అన్న వేమన్న 'అవినీతిపరుడుగాక నీతిపరుడు కాలేడయా' అన్న ఒక్క ముక్క గనక అని ఉంటే మన పాలకులు ఆయనకు (సంస్కరణ) బ్రహ్మరథం పట్టి ఉండేవాళ్లు. వూరూరా ఆయనకు గుళ్లూ గోపురాలు కట్టించేవాళ్లు. 'చెక్కు' భజనలుచేసేవాళ్లు. అయితే, అంత 'అదృష్టం' వేమనకు దక్కలేదు. అయినా మన నాయకులు వేమన చెప్పిన మాటను కాస్త మార్చి 'తినగ' తినగ 'స్కాము' తీయనుండు అంటున్నారు. ఎప్పటికప్పుడు 'అవినీతి బ్రహ్మోత్సవాలు'జరిపిస్తూ 'ఆదర్శం'లోకి 'అడుగు'వేస్తున్నారు.

ఇందుకు గిరీశమే స్ఫూర్తి. ''యిన్ఫెంట్‌ మారేజీలు అయితేనేగాని, యంగ్‌విడోజ్‌ వుండరు. విడోజ్‌ వుంటేనేగాని విడో మారియేజ్‌ రిఫారమ్‌కి అవకాశం వుండదు గదా! సివిలిజేషన్కల్లా నిగ్గు విడోమారియేజ్‌ అయినప్పుడు, యిన్ఫెంట్‌ మారేజీల్లేకపోతే సివిలిజేషన్‌ హాల్టవుతుంది. మరి ముందుకు అడుగుపెట్టలేదు. గనక తప్పకుండా యిన్ఫెంట్‌ మారియేజ్‌ చేయవలసిందే'' అంటాడు గిరీశం. ఆ లెక్కన అవినీతే లేకపోతే అవినీతి నిర్మూలన ఎలా జరుగుతుంది? 'తిన్నది' ఎలా అరుగుతుంది? తక్కువ 'తిన్న'వారెవరూ ఉండకూడదన్న సదాశయంతో 'చేతి'కి ఎముకలేకుండా 'సంత'ర్పణలు సాగుతున్నాయి.

వనభోజనాలు ఒక్క కార్తీకమాసంలోనే జరిగితే ఎవరైనా ఎంత తినగలరు? అందుకే మహానాయకుల చేతి చలువతో ఏడాదిలో అన్ని మాసాల్లోనూ, అన్ని మోసాల్లోనూ 'ధన భోజనాలు' పుష్కలంగా జరుగుతున్నాయి. 'జేబు నిండా డబ్బు... కంటినిండా నిద్ర' అనేది 'నోటికి నోరు శాతం' అమలు అయిపోతున్నది!

అలాగని, మాంసం తిన్నంతమాత్రాన ఎముకలు మెళ్లో వేసుకోవాలని ఎక్కడన్నా ఉందా? ముడుపులు ముట్టినంతమాత్రాన మాటల్లోనూ మడి కట్టుకోకూడదని ఎవడు చెప్పాడు? అందువల్ల 'నేత' బీరకాయలు, 'నీతి బీరకాయలు'బ్రహ్మాండంగా పుట్టుకొస్తున్నాయి.
'అవినీతి అంతర్జాతీయ సమస్య' అని ఇందిరమ్మే చెప్పారు. అప్పటికన్నా ఇందిరమ్మరాజ్యం ఇప్పుడే ఎక్కువ వెలిగిపోతోంది! 'తిన్నవాడికి తిన్నంత మహాదేవా!' అంటున్నారు. అయినా 'సంత'ర్జాతీయ సమస్యలను ఎవరేం చేయగలరు? ధృతరాష్ట్ర పాలకుల్లా చూస్తూ ఊరుకోవలసిందేనంటే ఎంత అవమానకరం!

ఎన్నో సమస్యలను పరిష్కరించిన గిరీశమే ఇందులోనూ పాలకులకు ఓ బాట చూపించాడు! దాంతో ఏలినవారు 'నినద భీషణ శంఖము దేవదత్తమే' అంటున్నారు. అవినీతి కనబడితే తోలు వలిచేస్తాం అని బెదిరిస్తున్నారు.సర్వ'శిక్షా'భినయాలను కళ్లకు కట్టినట్టు ప్రదర్శిస్తున్నారు.

''మంత్రాలకు చింతకాయలు రాలతాయా? తిట్లకు అవినీతి మటుమాయమైపోతుందా?'' అని గిట్టనివాళ్లు అంటుంటే ఆ మాటలు'చెవులూ'రించడం లేదు. 'ఎంతదాకానో ఎందుకు? మీ చుట్టుపక్కల,చుట్టపక్కాల అక్రమ సంపాదనకు పొగబెడితేచాలు అవినీతి దయ్యం దెబ్బకు పారిపోతుంద'ని ప్రతిపక్షాలవాళ్లు ఎద్దేవా చేస్తుంటే, 'దీపం చుట్టూ చీకటి ఉండడం సహజమేగా' అని అధికారపక్ష పౌరాణికులు 'అరికథలు' వినిపిస్తున్నారు. ఇది నిజమే. అవినీతి అంతం తాతలనాటి పతకం. 'అవినీతి సొంతం' ఇప్పటి నేతల పథకం. 'అవినీతి సొంతం' వల్ల తమకు చెడ్డపేరు వచ్చినా ఇతరులకు మంచి పేరు వస్తుంది. ఇదికూడా ప్రజాసేవే.

అధికారుల గోల అధికారులది. అవినీతి విషయంలో 'రాజ'నీతి చిత్రంగా ఉందని వారు వాపోతున్నారు. నేతల అవినీతిపై పెదవివిప్పని మారాజులు అధికారుల మీదికిమాత్రం ఒంటికాలిమీద లేస్తున్నారని, ఇదికూడా 'విభజించి పాలించు' సూత్రమేనని విమర్శిస్తున్నారు. నాయకుల ఆజ్ఞ లేకుండా ఫైలయినా కదులుతుందా? కళ్లు మూసుకుని ఫైళ్లమీద సంతకం పెట్టిననాడే ఈ విషయం గుర్తొచ్చి ఉంటే పరిస్థితి ఇంతదాకా వచ్చేదా? అని ప్రశ్నిస్తున్నారు. చివరికి 'బలి పశువులం మేమా?' అని నిలదీస్తున్నారు.

వీటి సంగతేమయినా ప్రభువుల 'విత్తశుద్ధి'ని శంకించడానికి వీల్లేదు. అవినీతిని సజీవంగా పట్టి ఇచ్చిన ఉద్యోగులకు 30 శాతం ప్రోత్సాహక వేతనాన్ని ఇస్తామని అధినాయకులు ఊరిస్తున్నారు. ఎంత జీతం ఇస్తేమాత్రం ఏం లాభం? అవినీతిని పట్టుకున్నవారు లంచం తీసుకున్నా దానిని వారు ఒప్పుకొంటే వదిలెయ్యాలంటూ చట్టం చేయాలని కొంతమంది 'నొక్కేసి' వక్కాణిస్తున్నారు. ఒక అవినీతిపరుణ్ని ఇంకో అవినీతిపరుడు మాత్రమే పట్టుకోగలడు కాబట్టే దొంగ చేతికే తాళాలిచ్చినట్టు అని మన పెద్దలు ఎప్పుడో చెప్పారు. పైగా 'అవినీతిపరులు ఎంతటివారయినా వదలొద్దు' అని సాక్షాత్తూ ప్రభుత్వాధినేతే చెబుతుంటే అవినీతిపరులయిన అధికారులు పులకించిపోతున్నారు. 'అందుకేగదా సార్‌! అవినీతిపరులు ఎంతటివారయినా, వారిని మేము వదలకుండా వాళ్లచుట్టూ ప్రదక్షిణలు చేస్తూ దక్షిణలు పుచ్చుకుంటున్నాం. అందువల్ల అవినీతిలో గుత్తాధిపత్యం తగ్గిపోయి వికేంద్రీకరణ జరుగుతుంది! అవినీతి పలచన కావడానికి మంది ఎక్కువ కావడమే కదా మార్గం'' అంటున్నారు.

ప్రభువులు గమనించని విషయం ఒకటుంది. అన్నిటికన్నా పారదర్శకతకు పెద్దపీట వేయడం ముఖ్యం. అవినీతి జరక్కపోతే దర్యాప్తు ఉండదు. దర్యాప్తు జరగకపోతే పారదర్శకత ఉండదు. కాబట్టి... అన్నీ తెలిసినవాళ్లకు ఇంతకుమించి ఏం చెప్పగలం

'బోగస్‌'స్వాములు

'కలడు కలండనెడివాడు కలడో లేడో' అన్నది సాక్షాత్తూ దేవుడి గురించిన డౌటు. ఇది పోతన భాగవతం లోది. 'కలదు కలందనెడి సంస్థ కలదో లేదో' అన్నది వ్యాపార బాగోతం. దీనిని తిప్పి చూస్తే ఎందరో 'బోగస్‌'స్వాములు ఎందెందు వెదకి చూసిన అందందే కలరన్న పద్యపాదం కనపడుతుంది. వ్యాపారమంటే కోట్లు లక్షలు పెట్టుబడి పెట్టాలి; 24X7 శ్రమపడాలి అన్న భావనకు పోటీగా పెట్టుబడులెందుకు? పట్టుబడకుండా ఉంటే అదే పది లక్షలు అదే పది కోట్లు అన్న ధోరణి ప్రబలుతోంది. మాయ వ్యాపారులు మాయం కాగానే ఉన్నావా అసలున్నావా అన్న పాట పాడాల్సి వస్తోంది.'జమీందారు రోల్సు కారు మాయంటావూ! బాబూ ఏమంటావూ?' అన్న శ్రీశ్రీ మాటలు వింటే ఆహా ఓహో అనుకుంటాం. కారు మాయ కాకపోవచ్చు లేని కారును ఉన్నట్లు భ్రమ కలిగించి డబ్బు కొట్టేసే మాయ'దారుల్లో'ని మోస'కారు'లను తలుచుకుంటే మాత్రం 'కార్‌'ఫుల్‌గా ఉండాలనిపిస్తుంది. సృష్టికి ప్రతిసృష్టి ఉన్నట్టే, అసలు వ్యాపారులకు తోడు బోగస్‌ వ్యాపారాలూ పుట్టుకొస్తున్నాయా అనిపిస్తోంది. మాయల మరాఠీ ఒక్కడు కాదు ఎంతోమంది ఉన్నారనిపిస్తుంది. వాక్చాతుర్యం ఉంటే చాలు 'ఫేక్‌'చాతుర్యం చేయొచ్చని నిరూపిస్తున్నారు. నకిలీ స్టాంపులు, నకిలీ నోట్లు, నకిలీ సంస్థలు నకిలీ సర్టిఫి'కేట్లు' కాదేదీ నకిలీకనర్హం అనిపిస్తుంది. నకిలీ నోట్లది చిదంబర రహస్యం అనడానికీ వీల్లేదు. అది పి.చిదంబరానికి కూడా తెలియని రహస్యమేమో. దాదాపు 1,69,000 కోట్ల రూపాయల విలువైన నకిలీ కరెన్సీ మన సమాజంలో చొరబడినందువల్ల బాధితులు 'చెల్లియో చెల్లకో...' పద్యం పాడుతున్నారని అంచనా. బోగస్‌ వ్యాపారమంటే సమాజం మీద జరిపే కుట్రతో సమానం. అన్నట్లు ఇంగ్లిషు వాడు స్థలాన్ని ప్లాట్‌ అన్నాడు. ప్లాట్‌ అంటే కుట్ర అని దాని అర్థం కూడా చెప్పాడు. దీంతో బోగస్‌ రియల్‌ ఎస్టేట్‌ వ్యాపారం గురించి తెల్లవాడికి ముందే ఐడియా ఉందని తేలిపోయింది. ప్లాట్లు కాగితాల మీదనే కనపడుతున్నాయి తప్ప ఎన్ని పాట్లు పడ్డా భూమ్మీద ఆనవాలు చిక్కట్లేదు. బోగస్‌కు దిగాక ఒకటి కుదురుతుంది ఇంకోటి కుదరదనలేం. ముందు 'మోహన'ంగా సాగిన యూరో లాటరీ 'కోలా'టం ఎలా బంద్‌ అయిందో అందరికీ తెలుసు. అలాగే 'వీసా'సనీయ వర్గాల ప్రకారం ఆ మధ్య చెన్నైలో 9 మంది తెలుగు మహిళలు 'గాలి'వీసాలతో చెన్నై ఎయిర్‌పోర్టులో పట్టుబడి 'వీసా'విరహే తవదీనా... అని పాట ఎత్తుకున్నారు. ఒక పెద్ద మనిషి తానో పెద్ద ఎయిర్‌పోర్టు పెడుతున్నట్టు జనాన్ని నమ్మించి 15 కోట్లు గుటకాయ స్వాహా చేసిన 'ధన'కార్యం ముందు ఇదెంత అనిపిస్తుంది.

'ఎవడు వాడు ఎచటి వాడు ఇటు వచ్చిన బోగసోడు' అని సర్కారు ఇటువంటి వాళ్ల వెంటపడి పట్టుకుని 'సమ్‌'కెళ్లు వేస్తుందని ఆశపడతాం.కానీ ఓ 'గద్ద'మనిషి ఏకంగా ప్రభుత్వ కార్యాలయాన్నే 'సృష్టించేసి' మంది డబ్బును ఎగరేసుకుపోయాడు. దాంతో ఎంతో మంది 'జేబులొ డబ్బులు పోయెనే' అనే 'బాట' పాడుకోవలసి వచ్చింది. విదేశాల్లో ఉద్యోగాలు చూపిస్తామని గాలి కబుర్లు చెప్పి జేబులు కత్తిరించి, బిచాణా ఎత్తేయడం బోలెడు గిరాకీ ఉన్న వ్యాపారమైపోయింది. 'దొర'కేంత వరకు ఇటువంటి 'దొరలు' ఎందరో!
బోగస్‌ వ్యాపార సుందరి 'ఫోర్‌'జరీ అంచు చీర కట్టుకుని హొయలొలకబోస్తుంటుంది కూడా. బోగస్‌ వ్యాపారాలను 'మార్చి' మార్చి జనాన్ని ఏమార్చి ఒక నెలలోనే 15వేల కోట్ల రూపాయల మేరకు సాగించారని 'నోటు'మాటగా చెప్పవచ్చు. హ్యాపీ లైఫ్‌ కోసం ఆశపడి బీపీ లైఫ్‌ తెచ్చుకున్నవాళ్లు ఉన్నారు. బోగస్‌ నవ్వులు నవ్వి 'అమ్మాయే సన్నగా అరనవ్వే నవ్వగా' అన్న సీను సృష్టించి నమ్మిన వాళ్లను రౌడీల చేత నట్టేట ముంచేట్టు చేయడమూ జరుగుతోంది!

చివరకు షాపింగ్‌లో బోగస్‌, సర్కారు ఇళ్ల కేటాయింపులోనూ బోగస్‌ వ్యవహారం 'చోటు' చూసుకుంటోంది! చిత్రమేమిటంటే బోగస్‌ వ్యవహారాల మీద స్ట్రాంగ్‌ యాక్షన్‌ తీసుకుంటామని మంత్రులు నమ్మకంగా చెప్తుంటారు. కొంత కాలానికి ఎంత గొప్ప 'యాక్షన్‌' అనిపిస్తుంది.మహామహా నటులు ఇంతగా నటించ లేరని వేరే చెప్పాలా?
-ఫన్‌కర్‌

ఫన్‌కర్‌ ఫటాఫట్‌

* నేను ఒక అమ్మాయిని ప్రేమించే పెళ్లి చేసుకున్నా. అయినా ఇద్దరి ఐడియాలూ కలవడం లేదు. ఇదో పెద్ద సమస్య అయిపోయింది. పరిష్కారం చెప్పి పుణ్యం కట్టుకోండి.

అదేం పెద్ద సమస్య? ఇద్దరి సెల్‌ఫోన్లకూ ఐడియా కనెక్షన్లు తీసుకోండి. ఐడియాలు అవే కలుస్తాయి.
________________________________
* ఎంసెట్‌లాగా బీసెట్‌ పెట్టి అందులో ఉత్తీర్ణులైన వాళ్లనే వ్యాపారం చేయడానికి అనుమతిస్తే?

ఉత్తీర్ణులైన వాళ్లు ఏం'సెట్టు'లే హలా అంటారు. కానివాళ్లు 'ఎంట్రన్సు'లోనే ఆగిపోయి ఎంత'సెట్టు'కు అంత 'ధూళి' అని పాడుకోవాల్సిందే.
________________________________
*స్టాక్‌తత్వం ఒక్కముక్కలో చెప్పండి?

అంతా 'జోక్‌'!
________________________________
* బడా పారిశ్రామికవేత్తకైనా, రాజకీయ నాయకుడికైనా అవసరమైనవి?

'కోట్లు...' వరించడానికైనా, ధరించడానికైనా.
________________________________
* రామాయణంలోనూ, భారతంలోనూ వ్యాపారం ఉందా?

అప్పుడుందో, లేదో తెలీదు గాని, ఇప్పుడు మాత్రం రామాయణం మీద, భారతం మీద బోలెడంత వ్యాపారం జరుగుతోంది.
________________________________
* కల నిజం కావాలంటే ఏంచేయాలి?

పగలు నిద్రపోకుండా ఉంటే సరి.
________________________________
* కచ్చితంగా మరో జన్మ ఉండాలంటే ఏంచేయాలి?

ఇచ్చినవాడి దగ్గరల్లా అప్పులు చేసేయాలి. రుణాలు తీర్చుకోవడానికైనా వాడు మళ్లీ పుట్టాలని అప్పులవాళ్లు సామూహిక ప్రార్థనలు చేస్తారు.
_______________________________
*మా ఆవిడ అలిగి పుట్టింటికి వెళ్లింది. దాని ప్రభావం ఏమైనా ఉంటుందా?

బహుశా స్టాక్‌ మార్కెట్‌ పడిపోవచ్చు (ఈమధ్య ఎక్కడేం జరిగినా పడిపోతున్నది షేర్ల ధరలే కదా!)
_______________________________
* లక్షకారు లక్షణంగా ఉంటుందంటారా?

కొనేవాడు కోటీశ్వరుడైతే!
_____________________________

ఫన్‌కర్‌ ఫటాఫట్‌

*కరెన్సీ నోటు మీద కూడా వాణిజ్య ప్రకటనలు ముద్రిస్తే?
చిదంబరానికి ఓ లెటరు రాయరాదూ...! ఆయనకు ఖజానా, మీకు జేబూ నిండుతాయి(వారిచ్చే పారితోషికంతో).
-----------------------------------
* ముకేశ్‌ అంబానీ తన పదవిని మీకిచ్చాడనుకోండి... మీరెలా ఫీలవుతారు?
నేను 'ఫీల్‌' అవడానికి ఏముంది? ఆ తర్వాత ఆయనే 'ఫీల్‌' అవ్వాల్సి వస్తుంది.
---------------------------------
* ఉదయం రూ.10 డిపాజిట్‌ చేస్తే సాయంత్రానికి రూ.1,000 ఇచ్చే పెట్టుబడి ఉంటుందా?
దాని సంగతి తెలియదు గాని, మీ ఇంటావిడకి పొద్దున్న ఓ రూ.1000 ఇచ్చి చూడండి. సాయంత్రానికి అది రూ.10 అవ్వకపోతే నామీద ఒట్టే.
-----------------------------------

* ఎవరైనా మిమ్మల్ని చూసి 'టాటా' అంటే?
నేను మాత్రం వెనక్కి తగ్గుతానా? వాళ్లను చూసి 'బిర్లా' అంటాను.
-----------------------------------
* నా స్నేహితుడు ఓ 'కడుపు మండే' రోగి. అతగాడికి 'రాజీవ్‌ ఆరోగ్యశ్రీ' రావాలంటే?
'మండే'నాడు ప్రయత్నించాలి.
-----------------------------------
* జేబు నిండితే ఆనందం ఎక్కువ కలుగుతుందా? కడుపు నిండితే ఆనందం ఎక్కువ కలుగుతుందా?
ఈ రెండూ కాదు. ఎదుటివాళ్ల జేబూ, కడుపూ ఖాళీగా ఉంటే సంతోషించే జనాలున్నప్పుడు.
------------------------------------
* చెవిటివాడి ఇంటికి అదృష్ట లక్ష్మి వచ్చి తలుపు తడితే... ఆయన ఏమంటాడు?
తను చెప్పిందే వినమంటాడు.
-----------------------------------
* వ్యాపారం అభివృద్ధి కావాలంటే ప్రతిభ అవసరమా?
'పర్సెంటేజీ'లు ఇచ్చే ప్రతిభ ఉండాలి.
----------------------------------
* ఏమి చదువుకుంటే పైకొస్తాను?
స్కామాయణం చదివితే సరి. ఆటోమేటిగ్గా పైకొచ్చేయొచ్చు.
__________________________________
(Eenadu, 06:01:2008)

ఫన్‌కర్‌ ఫటాఫట్‌

* హనుమంతుణ్ని నరకాసురుడి దగ్గరికి పంపితే ఏం చేసేవాడు?
చూసి రమ్మంటే 'పేల్చి' వచ్చేవాడు.

* సత్యభామ నరకాసురుడిని వధించకపోతే టపాకాయల పరిశ్రమ ఏమయ్యేది?
'కృష్ణా'ర్పణమయ్యేది. అప్పుడు ఆయనే ఢామ్మని నరకాసురుణ్ని ఒక చూపు చూసేవాడు.

* అందమైన అమ్మాయి కదా అని అప్పిచ్చాను. కనీసం వడ్డీ కూడా ఇవ్వడం లేదు ఎందుకు?
మీ 'అసలు' దృష్టి తెలిసాక వడ్డీ మాత్రం ఎందుకిస్తుంది?

* నాది పాప్‌కార్న్‌ బిజినెస్‌. దానికి 'ఫటాఫట్‌ కరాకర్‌' అని పేరు పెడదామనుకుంటున్నాను. మీకేమైనా అభ్యంతరమా?
మీరు ఆ పని చేస్తే నేనెందుకు ఊరుకుంటాను. పనిగట్టుకుని వచ్చి కరకరా నమిలేస్తాను(మిమ్మల్ని కాదులెండి, పాప్‌కార్న్‌ను).

* మీ చూపు కూడా సెన్‌'సెక్స్‌' మీదేనా?
మీ సెన్‌'సెక్స్‌' పరిజ్ఞానానికి నా జోహార్లు. కాని, దాని మీదే అతిగా ఆధారపడితే కుప్పకూలిపోయే ప్రమాదం ఉంటుంది జాగ్రత్త!

* నేనూ 'ఫ్రెష్‌'లు పెట్టి లక్షలు సంపాదిద్దామనుకుంటున్నా సాధ్యమవుతుందా?
'ఫ్రెష్‌' మైండ్‌తో చేస్తే సాధ్యంకానిది ఏముంటుంది?

* ఇన్సూరెన్స్‌ బిజినెస్‌లో ఎప్పుడూ బిజీగా ఉండాలంటే?
యమధర్మరాజు 'బిజినెస్‌' బాగుండాలి.

* మీరూ, నేనూ జాయింట్‌ వ్యాపారం చేద్దాం రెడీనా?
నా 'జాయింట్స్‌' ఏమవుతాయోనన్నదే నా బెంగంతా

* 'సత్యం' రామలింగరాజును అమెరికాలో సెటిల్‌ అవమంటూ బిల్‌గేట్స్‌ ఆహ్వానం పంపాడట. అలాకాక బిల్‌గేట్స్‌నే ఇండియా వచ్చేయమంటే...
'గేట్స్‌' ఎక్కడుంటేనేం నాయనా! అమెరికా బిల్లులన్నీ మనవే అవుతాయి. ఇండియా గేట్‌ను ఇండియా 'గేట్స్‌'గా మార్చుకుంటే సరి!

* కుబేరుడ్ని కావాలంటే...?
(కు)బేరసారాలు బాగా తెలిసి ఉండాలి.

* కూరగాయల ధరలు బాగా తగ్గాలంటే?
'ఫల'హారాలు మాత్రమే చేయాలి.
(Eenadu, 04:11:2007)
__________________

ఫన్‌కర్‌ ఫటాఫట్‌

రాజకీయాలకు వ్యాపార ప్రతిపత్తి లభిస్తే?
లైసెన్సు అవసరం లేదు. 'లైయింగ్‌ సెన్సు' ఉంటే చాలు.
-------------------------
సినీ నటుల్లాగా పారిశ్రామికవేత్తలతో క్రికెట్‌ ఏర్పాటు చేస్తే?
విజయానికి ఎవరి 'ఇండస్ట్రీ' మీద వారు ఆధారపడతారు.
---------------------------
ప్రపంచబ్యాంకు తల తాకట్టు పెట్టించుకుంటుందా?
'నేతల తాకట్టు' పెట్టించుకుంటుంది.
------------------------------
రేపటికల్లా నేను మిట్టల్‌ను అయిపోవాలంటే?
తక్షణం వ్యాపారంలోని మిట్ట(ల్‌) పల్లాలు ఔపోసన పట్టడమే.
----------------------------------
ఎంత పెద్ద కుంభకోణాలు బయల్పడినా ప్రభుత్వాలు పెద్దగా పట్టించుకోవు ఎందుకని?
'స్కామాయణం'లో 'పీడకల వేట' ఎందుకని.
-------------------------------------
ఆర్థికమంత్రి చిదంబరం మీ దగ్గరకొచ్చి బ్లాక్‌మనీని వెలికితీసే చిట్కా చెప్పమంటే ఏం చెబుతారు?
ముందు వైట్‌మనీనంతా 'బ్లాక్‌' చేసేయమంటాను.
-------------------------------------
రోబోలు పాఠాలు చెబితే..
అన్నీ 'మెకానికల్‌'గా ఉంటాయి.
--------------------------------------
సెన్సెక్స్‌ బాగా పెరిగిపోతోంది కదా! అయినా పేదవాళ్ల సంఖ్య తగ్గడం లేదెందుకు?
ఉన్నదాన్ని అందరూ 'షేర్‌' చేసుకోకపోవడం వల్లే.
--------------------------------------
నాకు 65 ఏళ్లు. రానురాను ఓపిక తగ్గుతోంది. అయినా బతకడానికి ఏదో ఒక వ్యాపారం చేయాలనుకుంటున్నారు. నేను బార్‌ పెడితే మేలా? రెస్టారెంట్‌ మేలా?
రెస్టారెంట్‌ పెడితేనే మేలు. ఏజ్‌'బార్‌' అవుతుంది గానీ రెస్టారెంట్‌ అవ్వదు కదా!
----------------------------------------
లెక్కల టీచర్లంటే పిల్లలు ఎందుకు భయపడతారు?
వాళ్లవల్ల బోలెడన్ని 'ప్రాబ్లమ్స్‌' కాబట్టి.
-----------------------------------------
పశువులకు కూడా 'మధ్యాహ్న గడ్డి పథకం' ప్రవేశపెట్టవచ్చు కదా!
ఓట్లు లేని ఆ మూగజీవులను ఎవరు పట్టించుకుంటారు చెప్పండి? అయినా పశువులకు శ్రమ లేకుండా గడ్డితినే మహానుభావులు బోలెడంత మంది ఉన్నారు కదా.
-----------------------------------------


ఏదైనా పార్టీ కిలో రెండ్రూపాయల బియ్యం పథకంలా కిలో రెండ్రూపాయల ఉల్లి పథకం ప్రవేశపెడితే?
రాజకీయం ఢిల్లీ చుట్టూ కాకుండా ఉల్లి చుట్టూ తిరుగుతుంది. 'ఉల్లీ' నిన్ను దలంచి...' అనేది అన్ని పార్టీల ప్రార్థనాగీతం అవుతుంది.

-------------------------------------------
(Eenadu, 18:11:2007)

ఫన్‌కర్‌ ఫటాఫట్‌

* ఇండియాలో ఉన్నప్పుడు అమెరికా బాగుంటుందనిపించింది. తీరా అమెరికా వెళ్లాక ఇండియాయే బాగుందనిపిస్తోంది. కారణమేమిటంటారు?
-కాళీ ప్రసాద్‌రాజు మావులేటి, న్యూహాంప్‌షైర్‌, అమెరికా 'ఎవర్‌గ్రీన్‌' కళ్లద్దాలు వాడండి. అప్పుడు ఎక్కడుంటే అక్కడంతా పచ్చగా కనబడుతుంది.

* వ్యాపారంలో 'నగ్న' సత్యాలు చెబితే ఏమవుతుంది?
-కొక్కళ్ల మురళి, బాబీనగర్‌, జడ్చర్ల
మీది ఏ వ్యాపారమైనా ఫర్వాలేదు గాని... బట్టల వ్యాపారమైతేనే డేంజర్‌ సుమా!

* నేను అర్జంటుగా ఒక స్టేజీకి రావాలంటే ఏం చేయాలి?
- వి. సుందరం, చెన్నై
మైకు రిపేరింగ్‌ నేర్చుకుంటే సరి. వెంటనే స్టేజీ ఎక్కేయొచ్చు.

* కోట్లు ఖర్చు పెట్టే నిర్మాత ధరించకూడని పాత్ర ఏమిటి?
-ఆర్‌. విఘ్నేశ్వరరావు, హైదరాబాద్‌
భిక్షాపాత్ర

* బిల్లు లేని సెల్లు
- ఫసుల్‌ రహమాన్‌, నాగర్‌ కర్నూలు
అంతా 'ఫ్రీ'పెయిడే

*మంత్రి పదవి తొందరగా రావడానికి నాయకులు ఏం వ్యాపారం చేస్తారు?
-విశ్వనాథ లక్ష్మీశైలజ, విజయవాడ
పార్టీ ఫిరాయింపుల వ్యాపారం

* విజిలెన్స్‌ కమిషన్‌ రిపోర్టులో మీ పేరేమయినా ఉందా?
- వి.ఆర్‌.కె. హనుమంతరావు, రాణి, సంగారెడ్డి
ఎడాపెడా 'తినేసే' వినాయకుడి పేరే లేదు. నా పేరెలా ఉంటుంది. అయినా, ఐ.ఎ.ఎస్‌. అంటే ఐయాం సేఫ్‌ అనేవాళ్లూ ఉన్నారు తెలుసా.

* బాగుపడాలంటే కాంట్రాక్టరయితే మంచిదా? ఇంజినీరయితే మంచిదా?
- పాలగుమ్మి అనుదీప్‌, అలేఖ్య, నర్సాపురం
కాంట్రాక్టరయినా, ఇంజినీరయినా 'కమీషన్‌'ర్‌ అయితే కచ్చితంగా బాగుపడొచ్చు.

* మీరు ప్రతీదీ 'లైట్‌'గా తీసుకుంటారా?
- అబ్బూరి అంబరీష్‌, ఎన్‌జీఓ కాలనీ, హైదరాబాద్‌
తీసుకుందామనే ఉంటుంది గానీ వేయింగ్‌ మెషీన్‌ ఒప్పుకోదు కదా

* రణరంగం కన్నా నష్టదాయకమైంది;
- అయ్యగారి శ్రావణి, పావని, సనత్‌నగర్‌, హైదరాబాద్‌
రుణ రంగం

* అద్దాల వ్యాపారం బాగుండాలంటే?
-కొప్పినీడి ప్రసాద్‌, చింతలపల్లి
అందగత్తెల సంఖ్య పెరగాలి.

* చెట్లకు డబ్బుకాస్తే..
- డి. రామానంద్‌, కరీంనగర్‌.
అందరూ గురజాడను (ఏ)మార్చి 'చెట్టు'పట్టాల్‌ వేసుకుని 'కోశ'స్థులంతా నడువవలెనోయ్‌' అంటారు.

* అప్పు చేసి పప్పు కూడు తినడం అంటే?
-సయ్యద్‌ బాషా, పాత రాయచోటి
ప్రపంచ బ్యాంకు నుంచి అప్పు తీసుకుని చెట్టు కింద స్కూళ్లలో కంప్యూటర్లు పెట్టడం.

* పెట్టుబడి లేకుండా లాభాల పంట పండే వ్యాపారం?
- జోగిపర్తి ప్రసాద్‌, బుచ్చిరెడ్డిపాలెం.
ఎన్నికల్లో 'టిక్కెట్లు' ఇప్పిస్తాం రండి అని నమ్మించి డబ్బు కొట్టేయడం.

* 'చిదంబర' రహస్యం ఏమిటో?
-వాస్తు రామచంద్రారావు, నెల్లూరు
'విత్తం ప్రభూ' అనడమే!

* నాకింద వేలాది మంది పనిచేయాలంటే
-పి.వి. రమణ, తిరుపతి
ఆకాశ హర్మ్యంలో అన్నిటి కన్నా పై అంతస్తులో ఉండడమే.
(Eenadu, 30:09:2007)